نائلون کے موزوں پر مسح کا حکم

نائلون کے موزوں پر مسح کا حکم

سوال  : آج کل جوتے میں نائلون کے موزے پہنے جاتے ہیں، طہارت کے وقت ایسے موزوں پر مسح کرنا کافی ہے یا نہیں۔ اسی طرح جوتوں کے اوپر مسح کر سکتے ہیں یا نہیں؟

الجواب وباللہ التوفیق:-

                نائلون کے موزوں اور جوتوں پر مسح کرنا اس وقت درست ہوگا جب کہ ان میں فقہاء کرام کی بتلائی ہوئی شرطیں پائی جائیں ورنہ ان پر مسح کرنا جائز نہ ہوگا۔ جیسا کہ صاحب عمدۃ السالک نے اس کی وضاحت فرمائی :

1 - أن يلبسه على وضوء كامل.

2 - وأن يكون طاهراً.

3 - وساتراً لجميع محل الفرض.

4 - ومانعاً لنفوذ الماء.

5 - ويمكن متابعة المشي عليهما لتردُّد مسافر لحاجاته، سواء كان من جلد، أو لِبْدٍ، أو خِرَقٍ مطبَّقة، أو خشب، أو غير ذلك، أو مشقوقاً شد بشَرَج. 1ه(عمدة السالك ص 18)

اور ان شرطوں میں سے چوتھی اور پانچویں شرط نائلون کے موزوں میں نہیں  پائی جاتی، اس لئے مسح درست نہیں۔

                بعض حضرات نے ایک اور شرط کا اضافہ فرمایا کہ وہ حلال ہو، جس کو امام ابن صباغ و غزالیؒ نے راجح قرار دیا۔

قِيلَ: وَحَلاَلاً وهو قول ابن القاص. وأشار ابن الصباغ والغزالي إلى ترجيحه؛ لأن المسح رخصه وهي لا تناط بالمعاصي. (النجم الوهاج 1/367)

نیز صاحب نجم الوھاج نے صریح عبارت نقل فرمائی 

وَلاَ يُجْزِئُ مَنْسُوجٌ لاَ يَمْنَعُ مَاءً فِي الأَصَحِّ[1] (النجم الوهاج 1/368)

کتبہ: مفتی عمر بن ابو بکر الملاحی الحسینی الحضرمی الشافعی

---

[1] نیز دیکھئے:- عجالۃ المحتاج 1/120؛ حاشیۃ البجیرمی علی شرح المنھج الطلاب 1/110؛ العباب ص 135؛ روضۃ 1/124۔

بے وضو شخص کا قرآنی آیات ٹائپ کرنا

بے وضو شخص کا قرآنی آیات ٹائپ کرنا

سوال:- اگر کوئی شخص کمپیوٹر پر بغیر وضوء قرآنی آیات ٹائپ کرے تو اس کا شرعاً کیا حکم ہے؟

الجواب وباللہ التوفیق:-

                اگر کوئی شخص کمپیوٹر پر قرآنی آیات اس طور پر ٹائپ کر رہا ہے کہ وہ اس کو چھو نہیں رہا ہے تو ایسے شخص کے لئے اس طرح کرنا جائز ہے درانحالیکہ وہ محدث ہو۔ جیسا کہ امام نوویؒ نے اس کی وضاحت فرمائی۔

".. وهل للبالغ كتابة القرآن وهو محدث أوجنب، وكذلك المرأة؟. الجواب:.. وأما البالغ من الرجال أو النساء، فلا يجوز له كتابةُ القرآن إِلا أن يكتبه بحيث لا يمسّ المكتوبَ فيه. ولا يحمله بأن يضعه بين يديه ويرفع يده في حالل الكتابة[1] 1ھ"(فتاویٰ للامام النووی ص 33)

"یہ حکم جس طرح کتابت کے لئے اسی طرح ٹائپ اور کمپوزنگ کے لئے بھی ہے۔1ھ"(جدید فقہی مسائل 1/103)

کتبہ: مفتی عمر بن ابو بکر الملاحی الحسینی الحضرمی الشافعی

---

[1]  نیز دیکھئے:- التھذیب 1/278؛ مغنی المحتاج 1/150؛ عجالۃ المحتاج 1/80؛ حاشیۃ البجیرمی علی شرح منھج الطلاب 1/68؛ العباب المحیط 89؛ اسنی المطالب 1/119۔

نا محرم کو چھونے سے وضوء ٹوٹنے کے دلائل مع عدم نقض والی روایات کے جوابات

سوال : کونسی عورت کو چھونے سے وضوء ٹوٹ جاتا ہے اور اس کی کیا دلیل ہے؟

الجواب وباللہ التوفیق:-

                بلا حائل اجنبی مرد و عورت کی چمڑی کا آپس میں چھوجانا ایسی صورت میں دونوں کا وضوء ٹوٹ جائے گا  (اور دونوں کی عمر اتنی ہو کہ عرفاً ایک سلیم الفطرت کو انہیں دیکھ کر غالباً شہوت آسکتی ہے اس کے جذبات اُبھر سکتے ہیں۔)

                جیسا کہ امام نوویؒ نے اس کی وضاحت فرمائی ہے

"قَدْ ذَكَرْنَا أَنَّ مَذْهَبَنَا أَنَّ الْتِقَاءَ بَشَرَتَيْ الْأَجْنَبِيِّ وَالْأَجْنَبِيَّةِ ينتقض سواء كان بشهوة وبقصد أم لا ولا ينتقص مَعَ وُجُودِ حَائِلٍ وَإِنْ كَانَ رَقِيقًا[1]1ھ" (المجموع 1/37)

دلائل:-

ہمارے مسلک پر بہت ساری احادیث دلالت کرتی ہیں

1) اللہ تعالیٰ کا فرمان "أو لمستم النساء"(سورہ مائدہ آیت 6) لمس کا اطلاق ہاتھ سے چھونے پر ہوتا ہے جیسے اللہ تعالیٰ کا فرمان " فَلَمَسُوهُ بِأَيْدِيهِمْ"(سورہ انعام آیۃ 7) ؛ آپ ﷺ کا حضرت ماعز رضی اللہ عنہ  سے ارشاد فرمایا "لَعَلَّكَ قَبَّلْتَ أَوْ لَمَسْتَ" رواہ البخاری فی الحدود 6824 بلفظ  "«لَعَلَّكَ قَبَّلْتَ، أَوْ غَمَزْتَ، أَوْ نَظَرْتَ»"؛ نهى عن بيع الملامسة أخرجه البخاري 2146 واليد زناها اللمس في حديث ابي هريرة عند المسلم 2657 بلفظ واليد زناها البطش ؛  نیز حضرت عائشہ رضی اللہ عنہا کی حدیث  قَلَّ يَوْمٌ إلَّا وَرَسُولُ اللَّهِ صَلَّى اللَّهُ عَلَيْهِ وَسَلَّمَ يَطُوفُ عَلَيْنَا فَيُقَبِّلُ وَيَلْمِسُ" أخرجه البيهقي باب الوضوء من الملامسة 1/123 زاد ما دون الوقاع

قال اهل اللغة : اللمس يكون باليد وبغيرها وقد يكون بالجماع المعجم الوسيط ص 838

امامنا الشافعیؒ نے ایک شعر کہا:

وَأَلْمَسْتُ كَفِّي كَفَّهُ طَلَبَ الْغِنَى                وَلَمْ أَدْرِ أَنَّ الْجُودَ مِنْ كَفِّهِ يُعْدِي

                اسی طرح مالك عن ابن شهاب عن سالم بن عبد الله بن عمر عن  أبيه قال قُبْلَةُ الرَّجُلِ امْرَأَتَهُ وَجَسُّهَا بِيَدِهِ مِنْ الْمُلَامَسَةِ فَمَنْ قَبَّلَ امْرَأَتَهُ أَوْ جَسَّهَا بِيَدِهِ فَعَلَيْهِ الْوُضُوءُ أخرجه مالك في الموطأ باب : الوضوء من قبلة الرجل إمرأته، وأخرجه الشافعي في الأم باب : الوضوء من الملامسة والغائط۔

                مزید براں امام شافعیؒ نے ابن عمر رضی اللہ عنہ کے قول سے استدلال فرمایا:

وَإِذَا أَفْضَى الرَّجُلُ بِيَدِهِ إلَى امْرَأَتِهِ أَوْ بِبَعْضِ جَسَدِهِ إلَى بَعْضِ جَسَدِهَا لَا حَائِلَ بَيْنَهُ وَبَيْنَهَا بِشَهْوَةٍ أَوْ بِغَيْرِ شَهْوَةٍ وَجَبَ عَلَيْهِ الْوُضُوءُ وَوَجَبَ عَلَيْهَا أخرجه البيهقي 1/124، وعبد الرزاق 497.

عدم نقض والی روایات کے جوابات

بہر حال وہ احادیث جس میں عدم نقض کا حکم ثابت ہوتا ہے ان کی تفصیل مع الجوابات یہ ہے۔

1) عن حبيب ابن أَبِي ثَابِتٍ عَنْ عُرْوَةَ عَنْ عَائِشَةَ رَضِيَ اللَّهُ عَنْهَا أَنَّ النَّبِيَّ صَلَّى اللَّهُ عَلَيْهِ وَسَلَّمَ قَبَّلَ بَعْضَ نِسَائِهِ ثُمَّ خَرَجَ إلَى الصَّلَاةِ وَلَمْ يَتَوَضَّأْ أخرجه الترمذي في الطهارة 1/86

الجواب: دو وجہ سے

1) احسن و اشهر جواب یہ ہے:

باتفاقِ حفاظ یہ حدیث ضعیف ہے۔ ان میں سفیان ثوری ، یحیی بن سعید القطان، احمد بن حنبل، ابو داود، ابو بکر نیسابوری، ابو الحسن دار قطنی، ابو بکر بیہقی اور متأخرین و متقدمین ہیں بلکہ امام احمد بن حنبل و ابو بکر نیسابوری اور ان کے علاوہ حضرات رقمطراز ہیں:

غلط حبيب من قبلة الصائم الى القبلة في الوضوء 1ھ

امام ابو داود رحمہ اللہ نے فرمایا: " رُوِيَ عَنْ سُفْيَانَ الثَّوْرِيِّ أَنَّهُ قَالَ مَا حَدَّثَنَا حَبِيبٌ إلَّا عَنْ عُرْوَةَ الْمُزَنِيِّ يَعْنِي لَا عَنْ عُرْوَةَ بْنِ الزُّبَيْرِ وَعُرْوَةُ الْمُزَنِيّ مَجْهُولٌ وَإِنَّمَا صَحَّ مِنْ حَدِيثِ عَائِشَةَ أَنَّ النَّبِيَّ صَلَّى اللَّهُ عَلَيْهِ وَسَلَّمَ كَانَ يُقَبِّلُ وَهُوَ صائم" بخاری 1928، مسلم 1107

2) والجواب الثانی : اگر اس حدیث کو بالفرض صحیح بھی مان لے تو یہ کہا جائے گا کہ یہ بوسہ لینا حائل کے ساتھ ہو جیسا کہ دیگر ادلہ کے درمیان جمع کرنے سے پتہ چلتا ہے۔

2) عَنْ أَبِي رَوْقٍ عَنْ إبْرَاهِيمَ التَّيْمِيِّ عَنْ عَائِشَةَ أَنَّ النَّبِيَّ صَلَّى اللَّهُ عَلَيْهِ وَسَلَّمَ كَانَ يُقَبِّلُ بَعْدَ الْوُضُوءِ ثُمَّ لَا يُعِيدُ الْوُضُوءَ أخرجہ الترمذی باب: ماجاء فی ترک الوضوء من القبلۃ

الجواب: ائمۃ محدثین نےا س حدیث کو ضعیف قرار دیا دو (2) اعتبار سے

                1)یحیٰ بن معینؒ نے ابوروق کو ضعیف کہا

                2) ابراھیم تیمیؒ نے حضرت عائشہ رضی اللہ عنہا سے نہیں سنا

قال الترمذي باب ما جاء في ترك الوضوء من القبلة

وَقَدْ رُوِيَ عَنْ إِبْرَاهِيمَ التَّيْمِيِّ، عَنْ عَائِشَةَ، «أَنَّ النَّبِيَّ صَلَّى اللَّهُ عَلَيْهِ وَسَلَّمَ قَبَّلَهَا وَلَمْ يَتَوَضَّأْ»، وَهَذَا لَا يَصِحُّ أَيْضًا، وَلَا نَعْرِفُ لِإِبْرَاهِيمَ التَّيْمِيِّ سَمَاعًا مِنْ عَائِشَةَ، وَلَيْسَ يَصِحُّ عَنِ النَّبِيِّ صَلَّى اللَّهُ عَلَيْهِ وَسَلَّمَ فِي هَذَا البَابِ شَيْءٌ

امام بیہقیؒ نے فرمایا:

وَقَدْ رَوَيْنَا سَائِرَ مَا رُوِيَ فِي هَذَا الْبَابِ فِي الْخِلَافِيَّاتِ وَبَيَّنَّا ضَعْفَهَا فَالْحَدِيثُ الصَّحِيحُ عَنْ عَائِشَةَ فِي قُبْلَةِ الصَّائِمِ فَحَمَلَهُ الضُّعَفَاءُ مِنْ الرُّوَاةِ عَلَى تَرْكِ الْوُضُوءِ (المجموع 2/32)

3) حضرت عائشہ رضی اللہ عنہا کی صحیح حدیث سے استدلال کرتے ہیں

أَنَّ النَّبِيَّ صَلَّى اللَّهُ عَلَيْهِ وَسَلَّمَ صَلَّى وَهُوَ حامل أمامة بنت زينب رضي الله عنهما فَكَانَ إذَا سَجَدَ وَضَعَهَا وَإِذَا قَامَ رَفَعَهَا رواه البخاري 516، 5996 ومسلم543 فی المساجد

الجواب:- اس حدیث کے مختلف جوابات دئے گئے

1)اظهر: رفع و وضع کی وجہ سے التقاء بشرتین لازم نہیں آتا۔

2) وہ چھوٹی تھیں اور چھوٹی بچی کو چھونے سے خود شوافع کے یہاں وضوء نہیں ٹوٹتا

3) وہ تو آپ کی نواسی محترمہ تھیں، جس بناء پر وہ محرم ٹہریں اور محرم کو چھونے سے عندنا نقضِ وضو نہیں ہوتا۔

4) صحیحین کی حضرت عائشہ رضی اللہ عنہا والی دوسری حدیث

أن النبي صلى الله عليه وسلم كان يصلي وهي معترضة بينه وبين القبلة فإذا أراد أن يسجد غمز رجلها فقبضتها أخرجه البخاري في الصلاة باب الصلاة في الفراش 382،383،384،508،511،512،513،514،519،997،1209

ومسلم في باب الاعتراض بين يدي المصلي 512

الجواب: اس حدیث کو حائل پر محمول کریں گے

5) نسائی کے صحیح الاسناد حدیث کے ذریعہ  " فإذا أراد أن يوثر مسني برجله " أخرجه النسائي 1/101،102

الجواب: آپ ﷺ نے حائل کے ساتھ چھویا اور یہ بات بستر پر سونے والے شخص کے حق میں ظاہر ہے اور یہ دونوں جوابات ملموس کے طھر کو ماننے کی صورت میں ہے ورنہ اس کی کوئی ضرورت نہیں

6) قیاس کیا محارم اور بالوں پر اور کہا  کہ لمس ناقض وضوء ہے تو لمس الرجل الرجل بھی ناقض وضوء ہونا چاہئے جیسا کہ جماع الرجل الرجل جماع المرأۃ کی طرح ہے۔

الجواب: بالوں کو چھونے پر تلذذ حاصل نہیں اور محرم و رجل مظنۂ شہوت نہیں اس باب میں امام الحرمین نے قیاس کو باطل کیا۔ (انظر ھذا التفصیل : المجموع 2/38 تا 43) 

کتبہ: مفتی عمر بن ابو بکر الملاحی الحسینی الحضرمی الشافعی

---

[1]  نیز دیکھئے :- تحفۃ الطلاب 1/18؛ نھایۃ المحتاج 1/116؛ تحفۃ المحتاج 1/53؛ العزیز 1/161؛ عجالۃ المحتاج 1/78۔

انسان و حیوان کے باطن سے نکلنے والی اشیاء کا حکم

انسان و حیوان کے باطن سے نکلنے والی اشیاء کا حکم

1۔لعاب (تھوک)، آنسو، پسینہ اور بلغم کا وہی حکم ہوگا جو اس حیوان کا ہے۔ اگر حیوان نجس  ہو تو مذکورہ اشیاء بھی نجس، ورنہ طاہر (کتے اور سور کا تھوک وغیرہ بھی نجس ہے، مویشیوں وغیرہ کا تھوک، پسینہ سب پاک ہے۔)

2۔ خون، پیشاب، پاخانہ، بیٹ اور قئی جیسی چیزیں تمام حیوانات کی نجس ہیں۔ آپ ﷺ کے بدن اطہر سے نکلے ہوئے ان فضلات کو بھی جمہور نے نجس کہا ہے۔ لیکن امام بغوی قاضی، سبکی، بارزی، زرکشی، ابن الرفعہ، بلقینی، حافظ ابن حجر اور رملی رحمہم اللہ وغیرہ حضرات نے اس کے برعکس طہارت کے قول کو ترجیح دی ہے۔ (حاشیۃ الجمل 1/174)

3۔ مچھلی اور ٹڈی کا خون اور بیٹ، ایسے جانداروں کا پاخانہ جن میں بہنے والا خون نہ ہو، اور تلی اور جگر سے ٹپکنے والا خون نجس ہے۔

4۔ مأکول اللحم یعنی ایسے جانور  جن کا گوشت کھانا جائز ہے کا دودھ پاک ہے، اور غیر مأکول اللحم یعنی وہ جانور جن کا گوشت کھانا جائز نہیں ہے ، ان کا دودھ نجس ہے۔

5۔ کتے اور سوّر اور ان کے فرع کی منی ناپاک ہے۔ انسانوں سمیت بقیہ سارے جانداروں کی منی پاک ہے۔

6۔ انڈے پاک ہیں، چاہے غیر مأکول اللحم پرندے کے ہوں۔

7۔ مشک پاک ہے، مشک کا نافہ اگر ہرنی کی زندگی میں جدا ہوا ہو تو پاک ہے ورنہ نجس ہے۔

8۔ جو کھیتی اور پودے نجاست پر اُگے ہیں نجس العین نہیں، لیکن نجاست کے لگنے سے نجس ہوجاتے ہیں۔ لہٰذا دھونے سے پاک ہوجائیں گے۔ ان پودوں کی بالیوں میں تیار ہونے والے دانے پاک ہیں۔

9۔ پیپ نجس ہے، اسی طرح زخموں کا پانی اگر متغیر ہو تو نجس ہے، ورنہ نہیں۔

10۔ نجاست کا دھواں بھی نجس ہے

11۔ عورت کے فرج (اگلی شرمگاہ) کی رطوبت (تری) علقہ (جما ہوا خون) اور مضغہ پاک ہیں۔

12۔  صفراء اور جگالی نجس ہیں،

13۔ نیند کی حالت میں منہ سے بہنے والی رال حلق کے کوے سے نکلے تو پاک ہے اور معدے سے نکلے تو نجس ہے۔ طویل نیند کی صورت میں بہنا بند ہو تو وہ کوے سے نکلنے والا سمجھا جائے گا، اگر شک ہو تو نجس نہیں سمجھیں گے، البتہ احتیاطاً دھو دینا بہتر ہے۔

14۔ جس شخص کو نیند کی حالت میں کثرت سے رال کی شکایت ہو، باجود نجس ہونے کے اس کے حق میں اسے معاف رکھا جائے گا۔

15۔ دانہ کسی جانور کے کھانے کے بعد پاخانہ میں صحیح سالم نکل آئے اور اس کی سختی اس حد تک باقی ہو کہ بونے کی صورت میں اُگ سکتا ہے تو وہ دانہ پاک ہے۔ صرف اوپری حصہ دھو دینا ضروری ہے۔ لیکن اگر دوبارہ اُگنے کے قابل نہیں رہا تو نجس العین ہوچکا۔(تحفۃ الباری فی الفقہ الشافعی 1/71)

نجاستوں اور نجس پانی کا بیان

نجاستوں اور نجس پانی کا بیان

تعریف: نجاست لغت میں ہر گندگی کو کہا جائے گا، شریعت میں نجاست سے ایسی گندگی مراد ہے جس کی موجودگی میں عام حالات میں نماز صحیح نہیں ہوتی۔

نجاست کی قسمیں: نجاست کی دو (2) قسمیں ہیں

1)نجاستِ حکمیہ

2) نجاستِ  عینیہ

1) نجاست حکمیہ: نجاست حکمی ایسی نجاست جو اپنے محل سے آگے بڑھ جائے جیسے جنابت۔

2)نجاست عینیہ: ایسی نجاست جو اپنے محل سے تجاوز نہ کرے جیسے پیشاب وغیرہ۔

نوٹ:- جس نجاست عینیہ کا کائی اثر باقی نہ ہو جیسے پیشاب کپڑے پر لگ جائے جس میں نہ بدبو ہے نہ مزہ نہ رنگ اس کو بھی نجاستِ حکمیہ کہتے ہیں۔ (جمل 1/168)

اشیاء کی اقسام: ساری اشیاء کی دو قسم کر سکتے ہیں۔

1) جَماد

2) حیوان۔

1)جَماد: جماد کا مطلب جو نہ حیوان ہو نہ حیوان تھا نہ کسی حیوان کا جزء ہے نہ ہی کسی حیوان سے نکلا ہے۔

شراب اور نشہ والی نبیذ کے علاوہ سارے جَمادات پاک ہیں۔ حیوانات میں کتا، خنزیر (سُوَّر) اور ان دونوں سے کسی ایک کے بھی دوسرے جانور سے ملاپ کی وجہ سے جو پیدا ہو نجس ہیں۔ اس کے علاوہ سارے جاندار اپنی زندگی میں پاک ہیں۔

نوٹ:مردار میں پیدا ہونے والے کیڑے بھی پاک ہیں۔

مردار کی تعریف:- جن حیوانات کو شرعی طریقے سے (ذبح ، شکار وغیرہ کے ذریعہ) حلال نہ کیا گیا ہو اور روح نکل چکی ہو تو اس کو مردہ  کہا جائے گا۔ (جمل 1/173)

پاک مردار: مردار میں صرف مچھلی، ٹڈی اور انسان پاک ہیں۔ کسی جانور کو ذبح کرنے کے بعد پیٹ سے مردہ جنین برآمد ہو ، تو وہ بھی پاک ہے۔

نوٹ:- خلقت مکمل ہونے کے بعد برآمد ہونے والے جنین کو اپنے ماں کے تابع سمجھتے ہوئے کھانا جائز ہے لیکن علقہ او مضغہ کا کھانا  نا جائز ہے۔(جمل 1/173)

شرعی طریقہ سے ذبح کئے ہوئے جانور کا حکم:- شرعی طریقے سے شکار کئے ہوئے جاندار کو ذبح کرنے کا موقع نہ ملے اور مر جائے، تب بھی وہ پاک ہے اور اس کا کھانا حلال ہے۔

مردار کے اجزاء: اس کے علاوہ سارے مردار نجس ہیں۔ مردار کے تمام اجزاء (ہڈی، بال، اون وغیرہ) نجس ہیں۔ کیوں کہ ان سب میں زندگی ہوتی ہے۔ (مغنی المحتاج 1/78)

مکھی وغیرہ: وہ جاندار جن کو اگر زندگی میں کاٹا جائے تو ان کے بدن سے خون نہ بہے ( یا تو خون نہ ہونے کی وجہ سے یا اس لئے کہ معمولی سا ہے، بہنے جیسا نہیں ) جیسے مکھی وغیرہ، ان کا مردہ بھی نجس ہی ہے، لیکن یہ پانی یا دوسر سیال(بہنے والی) چیز میں گر جائے (اور اس میں کوئی تغیر اس مردار کی وجہ سے پیدا نہ ہو) تو وہ سیال چیز نجس نہیں ہوگی۔ البتہ کسی نے اس طرح کے مردہ کو پانی وغیرہ میں ڈال دیا تو وہ نجس ہوجائے گا۔ اگر اس طرح کے مردوں کی کثرت کی وجہ سے تغیر پیدا ہو تو پھر وہ پانی یا مائع نجس ہوجائے گا۔ (مغنی المحتاج 1/78)

حدیث: آپ ﷺ نے فرمایا: "اگر کسی کے برتن میں مکھی گرے تو اسے مکمل ڈبو کر پھر نکال دو، کیوں کہ اس کے ایک پر میں بیماری ہے اور دوسرے میں شفا ہے۔"(بخاری) بعض روایات میں یہ اضافہ بھی ہے:"وہ اپنے بچاؤ کے لئے بیماری والا پر آگے کرتی ہے۔"(ابو داود، ابن خزیمہ، ابن حبان، تلخیص الحبیر 1/37)

پھلوں میں موجود کیڑے: سرکہ یا سیب وغیرہ پھل میں جو کیڑے پڑتے ہیں ان کا مردار بھی نجس ہے۔ البتہ اس کی وجہ سے وہ چیز نجس نہ ہوگی، کیوں کہ اس سے بچنا مشکل ہے، نیز ان اشیاء کو ان کیڑوں سمیت کھانا جائز ہے کیوں کہ اسے جدا کرنا کافی دشوار ہے۔

نوٹ: جن جانوروں کو کھانا حرام ہے انہیں ذبح کیا جائے تب بھی وہ نجس ہیں۔(مغنی المحتاج 1/78)

حیوان کے اجزاء کا حکم

اصول: ایک عام اصول یہ ہے کہ کسی بھی زندہ حیوان سے جو حصہ جدا ہو وہ نجس ہے۔

حدیث: "زندہ  (جانوروں کے بدن) سے جو (حصہ) جدہ کیا جائے وہ مردہ ( کے حکم میں ) ہے۔(مسند احمد، ترمذی، حاکم وغیرہ۔ تلخیص 1/39)

البتہ مندرجہ ذیل اشیاء اس اصول سے مستثنیٰ ہیں۔

1) مأکول اللحم (جن جانوروں کا گوشت کھانا جائز ہے) حیوانات کے بال، اون اور پَر جو زندگی میں کاٹ لئے گئے ہوں یا خود بخود جھڑے ہوں (پاک ہیں)

2) انسان کے بال

3) انسان، مچھلی اور ٹڈی کے بدن کا کوئی حصہ اور

4) انسان کا مشیمہ (وہ جھلی جس میں بچہ ہوتا ہے۔)

(تحفۃ الباری فی الفقہ الشافعی 1/69،70)

ماء مشمس کے مسائل

ماء مشمس کے مسائل

ماء مشمس: سورج کی تپش سے گرم ہونے والے پانی کو ماء مشمس کہیں گے۔

حوض اور تالاب کا پانی سورج کی تپش سے گرم ہو تو بالاتفاق اس کا استعمال مکروہ نہیں ہے۔ البتہ کسی برتن کا پانی سورج کی تپش اور دھوپ سے گرم ہو تو ان شرائط کے ساتھ مکروہ تنزیہی ہے۔

شرائط:

1)علاقہ گرم ہو،

2)برتن کا مادہ ایسا ہو جسے ڈھال کر بنایا جاسکتا ہو جیسے تانبا (ہوتھوڑے وغیرہ سے کوٹ کر جس کو پھیلا سکتے ہو عموماً دھات اس میں آجائے گی) لیکن سونا چاندی اس سے مستثنیٰ ہے۔

3) بدن میں استعمال کیا جائے (کپڑا وغیرہ دھونے میں استعمال کرنا مکورہ نہیں ہے)

نوٹ:- یہی پانی ٹھنڈا ہونے کے بعد اس کی کراہت ختم ہوجائے گی۔

نوٹ:- دلیل کے اعتبار سے امام نوویؒ نے عدم کراہت کو ترجیح دی ہے، مگر شافعی مسلک کے اعتبار سے کراہت کا قول راجح ہے، کیوں کہ امام شافعیؒ اور دارقطنیؒ نے بسندِ صحیح حضرت عمر رضی اللہ عنہ سے اس پانی سے غسل کی کراہت کو روایت کیا ہے۔

ماء مشمس کی کراہت کا سبب:-  مذکورہ بالا صورت میں دھوپ کی شدت کی وجہ سے برتن سے ذرات جدا ہو کر پانی میں شامل ہوتے ہیں، جو گرمی کی حالت میں بدن سے چھو جائے تو چمٹ کر برص (سفید داغ) کی بیماری کا سبب بن سکتا ہے اور یہی سبب کراہت ہے۔ اگر کسی کو عادل طبیب (ڈاکٹر) کے کہنے سے مشمس پانی کے استعمال کی وجہ سے برص ہونے کا غالب گمان ہو تو پھر اُسے اس پانی کا استعمال حرام ہے۔

ماء مشمس ان صورتوں میں مکروہ  نہیں: مٹی کے پکے ہوئے برتن، سرد یا معتدل علاقہ میں، بدن کے علاوہ کپڑے زمین یا کھانے وغیرہ میں اور اسی طرح ٹھنڈا ہونے کے بعد ماء مشمس کا استعمال مکروہ نہیں ہے۔ (فتح الواب مع الجمل 1/36)

(ملخصاً تحفۃ الباری فی الفقہ الشافعی 1/68)

پانی میں کسی دوسری چیز کے گرنے کے مسائل

پانی میں کسی دوسری چیز کا گرنا اور شامل ہونا

اصول:- اس سلسلے میں ایک عام ضابطہ یہ ہے کہ جن چیزوں کے شامل ہونے کے بعد پانی کو صرف پانی (یعنی ماء مطلق) نہیں کہہ سکتے، ایسے پانی سے طہارت ممنوع ہے، ورنہ صحیح ہے۔

            جن چیزوں سے پانی کو بچانا آسان ہو (اور عام حالات میں ان چیزوں کے خود بخود پانی میں شامل ہونے کی نوبت نہ آتی ہو) ایسی چیزوں کے پانی میں گرنے کی وجہ سے پانی میں ہلکا سا تغیر(تبدیلی) آجائے، تو وہ پانی طہور ہی ہے۔ (جب کہ وہ چیز پاک ہو)۔

مجاوِر:- جو چیز پانی میں شکر، نمک وغیرہ کی طرح گھلتی نہ ہو، بلکہ اپنی حالت پر باقی رہتی ہو اس کو "مُجاوِر"(یعنی پڑوس میں رہنے والا)  کہیں گے جیسے لکڑی ، پتھر وغیرہ۔

            کسی مُجاوِر کی وجہ سے زیادہ تغیر آجائے تب بھی وہ طہور ہی رہے گا جیسے لکڑی، تیل، موم وغیرہ کی وجہ سے۔ کافور کی دو قسم ہیں

1)ایک پانی میں گھلتا ہے،

2)دوسرا نہیں گھلتا ہے۔

پہلی قسم کے کافور کی وجہ سے زیادہ تغیر آجائے تو وہ طہارت کے قابل نہیں رہے گا، لیکن دوسری قسم کا کافور لکڑی وغیرہ کے حکم میں ہے۔

جن اشیاء سے پانی کو محفوظ رکھنا عام مدت میں ممکن نہ ہو ، جیسے  پانی کے بہنے یا رکنے کی جگہ میں موجود مٹی، کائی، گھندگ، نورہ ، (چونے کا پتھر) ھڑتال وغیرہ، ان اشیاء کی وجہ سے زیادہ تغیر بھی آجائے تو حرج نہیں ، پانی طہور ہے۔

نوٹ:- پانی میں پیدا ہونے والی مٹی کی وجہ سے تغیر بھی طہارت سے مانع نہیں ہے۔

اسی طرح مدت دراز تک ایک ہی جگہ رکے رہنے سے پانی میں جو تغیر پیدا ہوتا ہے اس میں کوئی حرج نہیں، گرم کیا ہوا پانی بھی طہور ہے۔

مذکورہ متغیر پانی، سمندری پانی، زم زم کا پانی اور گرم پانی اگرچہ کسی نجس چیز کو جلا کر گرم کیا گیا ہو، کو استعمال کرنے میں کوئی کراہت نہیں۔

نوٹ:- زیادہ گرم زیادہ سرد پانی استعمال کرنا مکروہ ہے۔

زعفران کا پانی: جن اشیاء کے پانی میں شامل ہونے کی نوبت عموماً نہیں آتی مثلاً زعفران ایسے اشیاء کی وجہ سے پانی میں اتنا تغیر آجائے کہ اب وہ ماء مطلق نہیں کہلائے گا، تو وہ طہور نہیں ہے۔

اگر کسی نے پانی نہ پینے کی قسم کھالی ہو تو اس حد تک متغیر پانی کے پینے سے اس کی قسم نہیں ٹوٹے گی۔

متغیر پانی کسے کہیں گے؟

            پانی کے مزہ، رنگ، یا بو میں سے کسی ایک وصف کا بدل جانا کافی ہے۔ قصداً مٹی پانی میں پھینکنے سے تغیر آیا ہو تب بھی وہ طہور ہے۔

نمک، پتے وغیرہ:- پانی سے بننے والے نمک کی وجہ سے اگر تغیر پیدا ہو تو حرج نہیں، دیگر نمک مضر ہوں گے۔ درختوں کے پتے پانی میں گر کر تغیر پیدا کریں، چاہے ریزہ ریزہ ہوں یا نہ ہوں تو وہ طہور ہے۔ اور قصداً پتے پانی میں پھینکے گئے اور اس کی وجہ سے تغیر پیدا ہوتو یہ مضر ہے۔

تقدیری تغیر: قلیل یا کثیر پانی میں ایسا پاک مائع( بہنے والی چیز، سیال) شامل ہوجائے، جو صفات میں پانی کے موافق ہو، (پای سے الگ اس میں کوئی رنگ یا مزہ یا بو نہ ہو) جیسے گلاب کا پانی جس کی خوشبو ختم ہو چکی ہو، درخت کا پانی، مستعمل پانی وغیرہ تو مذکورہ مائع کی مقدار اتنی ہو کہ اگر اس کا مزہ یا رنگ یا بو پانی کے مخالف ہوتا، تو پانی میں مؤثر تغیر پیدا کرتا تو اس پانی کی طہوریت ختم ہو جائے گی۔ اس تغیر کو تغیر تقدیری کہیں گے۔

            اور پانی کے مقابلہ میں اس مائع کی مقدار اتنی ہو کہ اوصاف میں مخالف تصور کرنے کے باوجود تغیر مؤثر پیدا نہیں کرے گا ، تو پانی طہور ہے اور اس صورت میں مکمل پانی طہارت میں استعمال کرسکتے ہیں، مائع کی مقدار کو آخر میں باقی رکھنے کی  ضرورت نہیں۔

ناکافی پانی: کسی کے پاس اتنا پانی ہو کہ طہارت کے لئے ناکافی ہو اور تھوڑا سا مائع ملانے کی صورت میں کافی ہوجاتا ہو تو ملالینا لازم ہے، لیکن اگر مائع کی قیمت طہارت کے لئے درکار پانی کی قیمت سے زیادہ ہو تو ملانا ضرورت نہیں۔

نوٹ: اس فصل میں مذکورہ مسائل میں پانی کے قلتین سے کم زیادہ ہونے کی کوئی قید نہیں ہے (سارے ہی صورتوں کا یہی حکم ہے۔)۔

بھاپ:- پانی کو جوش دینے کی وجہ سے بخارات (بھاپ) بلند ہو اور پھر وہ پانی میں تبدیل ہو تو وہ پانی بھی طہور ہے۔ لیکن اگر کسی دوسرے مائع کے بخارات سے ٹپکا ہوا پانی ہو تو طہور نہیں ہے جیسا کہ پسینہ طہور نہیں ہے۔

(ملخصاً تحفۃ الباری فی الفقہ الشافعی 1/68،69)

مستعمل پانے کے مسائل

ماء مستعمل کے احکام

مستعمل پانی:  رفع حدث کے لئے ( یعنی وضو یا غسل کے فرض میں) جو پانی استعمال ہو وہ طاہر( یعنی پاک تو) ہے لیکن طہور نہیں( یعنی پاک کرنے والا نہیں لہٰذا ایسے پانی کو پھر وضو وغیرہ کے لئے استعمال نہیں کرسکتے) جوپانی نفل طہارت میں استعمال ہو وہ طہور (یعنی پاک کرنے والا) بھی ہے مثلاً تجدیدِ وضو ( با وضو ہوتے ہوئے پھر وضو کرنا) سنت غسل، وضو یا غسل میں دوسری یا تیسری مرتبہ اعضاء وضو  کا دھونا، مضمضہ(کلی) کا پانی۔

نابالغ کے وضو کا پانی:-نفل نماز پڑھنے کے لئے کئے گئے وضو کا پانی اور نابالغ کے وضو کا پانی بھی طہور نہیں ہے۔

مستعمل پانی سے نجاست کا ازالہ:- جو مستعمل پانی رفع حدث میں استعمال نہیں کرسکتے، اس سے نجاست کا ازالہ بھی نہیں ہوگا ( اس پانی سے کسی نجس کپڑے کو اچھی طرح دھو یا جائے تب بھی وہ کپڑا شرعاً نا پاک ہی رہے گا، جب تک اس پر طہور پانی نہ بہایا جائے، پاکی حاصل نہیں ہوگی) اگر مستعمل پانی جمع کرنے کے بعد وہ قلتین [1] کی مقدار کو پہنچ  جائے تو پھر وہ طہور شمار ہوگا۔

قلتین پانی میں کوئی جنبی (جس کو غسل کی ضرورت ہو) اتر کر غسل کرے تو وہ پانی طہور ہی رہے گا۔ قلتین سے کم پانی میں کوئی جنبی اتر جائے ، یہاں تک کہ مکمل بدن پانی میں ہو پھر غسل کی نیّت کرے تو اس کا غسل صحیح ہوا۔ لیکن اب وہ پانی دوسرے کے حق میں مستعمل بن چکا۔

نوٹ:- جنبی کا بعض بدن پانی میں اور بعض پانی سے باہر ہو، اور وہ غسل کی نیت کرے، تو داخل حصہ تو پاک ہوا، اسی حال میں اگر بقیہ حصہ کو بھی پانی میں داخل کرے تو تو مکمل غسل ہوجائے گا لیکن غسل مکمل کرنے سے پہلے پانی سے الگ ہوا تو وہ پانی مستعمل شمار ہوگا، لہذا بقیہ غسل اس سے حاصل نہیں ہوگا۔

پانی مستعمل کب ہوگا؟

پانی جب تک کسی عضو پر ہی رہے (ابھی اس عضو سے جدا نہیں ہوا) تو وہ مستعمل نہیں کہلائے گا (اگر وضو کرنے والا چلو میں پانی لے تاکہ  کہنیوں سمیت ہاتھوں کو دھوئے اور چُلّو سے اسے کہنیوں کی طرف بہائے تو اگر چہ ہتھیلی اور آگے کے حصّے کی طہارت حاصل ہو رہی ہے، لیکن ابھی وہ پانی مستعمل نہیں سمجھا جائے گا اور کہنیوں تک دھونے کے لئے کام دے گا۔ یہی پانی نیچے گرنے کے بعد اسے لے کر آپ ہاتھ کا بقیہ حصّہ دھونا چاہیں تو صحیح نہیں ہے۔

اگر پانی متوضی (وضو کرنے والا) کے ایک عضو سے دوسرے عضو  کی طرف بہے تو وہ مستعمل کہلائے گا، یہاں تک کہ ایک ہاتھ سے دوسرے ہاتھ کی طرف منتقل ہو تو وہ مستعمل ہو چکا۔ مکمل چہرہ دھونے سے پہلے متوضی پانی میں ہاتھ ڈبوئے تو وہ مستعمل نہیں ہوگا، چہرہ مکمل دھونے کے بعد رفع حدث کی نیت سے ہاتھ قلیل پانی میں ڈالے تو وہ مستعمل ہوجائے گا۔ (یعنی ہاتھ کے حدث کو دور کرنے کی نیت سے جب پانی میں ہاتھ  ڈالا تو اتنا ہاتھ پاک ہوچکا۔ اور اس استعمال سے وہ پانی مستعمل ہوگیا۔ وضو کے بقیہ اعمال کو اس پانی سے انجام نہیں دے سکتے، البتہ ہاتھ اگر ابھی پانی سے جدا نہیں ہوئے ہیں۔ تو ان کو کہنیوں تک اندر داخل کرے تو ہاتھ کی طہارت کے لئے یہ کافی ہوگا، اس لئے کہ استعمال کا حکم عضو سے جدائی کے بعد لگے گا اسی طرح ایک مرتبہ چہرہ دھونے کے بعد دوسری یا تیسری مرتبہ بھی دھونے کے ارادے سے ہاتھ پانی میں داخل کرے تو وہ مستعمل نہیں ہوگا۔

نوٹ:- لیکن مذکورہ صورت میں چلو میں پانی لینے کی نیت سے (تاکہ ہاتھ باہر دھوئے) ہاتھ اندر داخل کیا ہے تو وہ پانی مستعمل نہیں ہوگا۔

نوٹ:- اور اگر بغیر کسی نیت کے داخل کیا ہے تو صحیح یہ ہے کہ مستعمل ہوجائے گا لیکن امام بغویؒ، کا فیصلہ یہ ہے کہ اس صورت میں بھی مستعمل نہیں ہوگا۔ امام شاشیؒ، امام غزالیؒ، امام ابن عبد السلامؒ، ابو عجیلؒ، ابو شکیلؒ اور قعیبیؒ وغیرہ حضرات نے اسی کو ترجیح دی ہے کہ بلا نیت ڈبونے سے وہ پانی مستعمل نہ ہوگا۔(ترشیح المستفیدین ص14)

مسئلہ: جنبی جب غسل کی نیت کرے تو اس کا بھی وہی حکم ہے جو محدث (یعنی بے وضو ) کا چہرہ دھونےکے بعد ہے ( یعنی فرض غسل کی نیت کے بعد قلیل پانی میں چلو سے پانی نکالنے کی نیت سے ہاتھ داخل کرے تو صحیح  ہے ورنہ پانی مستعمل  ہوجائے گا۔

مسئلہ: جو آدمی وضو کی نیت کو فرض نہیں مانتا ہو مثلاً کوئی حنفی، اس کے وضو کا پانی بھی مستعمل ہوگا۔ (ملخصاً تحفۃ الباری فی الفقہ الشافعیؒ  1/66،67)

---

[1]  قلتین یعنی دو قلہ کی مقدار= قلتین 500 رطل بغدادی کے مساوی ہوتا ہے۔ اگر کسی مکعب کے ہر ضلع کے لمبائی 60 سینٹی میٹر ہو تو یہ قلتین کے مساوی ہوگا(ضمیمہ عمدۃ السالک) لمبائی، چوڑائی اور گہرائی سوا ذِراع (ایک ہاتھ اور پاؤ ہاتھ) ہو تو یہ قلتین کی مقدار ہے (ایک ذراع = 48 سینٹی میٹر)۔ کلو گرام کے اعتبار سے قلتین 192.857 کلوگرام ہوگا(الفقہ المنھجی 1/34) (تحفۃ الباری 1/72)

جنبی شخص اور قرآن کریم کی تلاوت

جنبی شخص اور قرآن کریم کی تلاوت

قرآن  کریم کی تلاوت:

جنبی پر قرآن میں سے کچھ بھی تلاوت کرنا اگرچہ آیت کا ایک تکڑا ہوحرام ہے ، اور اگر وہ کوئی ایسی کتاب میں ہو جس میں قرآن سے دلیل لی گئی ہو تو اس آیت کا پڑھنا یہاں بھی حرام ہے اس لئے کہ دلیل کے لئے قرآن ہی مقصد ہوتا ہے(ذکر نہیں) جیسا کہ حضرت ابن عمر رضی اللہ عنہما سے مروی ہے کہ نبی کریم ﷺ نے فرمایا : جنبی شخص اور حائضہ قرآن میں سے کچھ نہ پڑھے۔[1]"

            اور جنبی کے لئے جائز ہے کہ قرآن میں موجود اذکار کو ذکر کی نیت سے پڑھے نہ کہ قرآن کی نیت سے جیسے مصیبت کے وقت  إِنَّا لِلَّهِ وَإِنَّا إِلَيْهِ رَاجِعُونَ (البقرۃ: 156) پڑھنا، سواری پر سوار ہوتے  وقت : سُبْحَانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ (13) وَإِنَّا إِلَى رَبِّنَا لَمُنْقَلِبُونَ( الزخرف: 13،14) پڑھنا وغیرہ اسی طرح کھاتے  ، پیتے قبل بسم اللہ اور الحمد للہ کہنا ذکر کے ارادہ سے نہ کے قرآن کی نیت سے۔ اسی طرح جو زبان پر بلا قصد جاری ہوجاتا ہے وہ بھی جائز ہے۔

            اور جنبی کے لئے جائز ہے کہ وہ قرآن کو دیکھے اور اس کو دل سے پڑھے زبان کو حرکت دئے بغیر اس لئے کہ دل سے پڑھنے کو قراءت نہیں کہتے۔

            جنبی کے لئے مسنون ہے کہ وہ جلد از جلد غسل کرے، اور تاخیر کرنا جائز ہے، لیکن مکروہ ہے کہ وضو کرنے سے پہلے سوئے جیسا کہ عمر رضی اللہ عنہ سے مروی ہے کہ انہوں نے فرمایا: اے  اللہ کے رسول ﷺ، کیا جنابت کی حالت میں ہم میں سے کوئی سو سکتا ہے؟ آپ ﷺ نے فرمایا: ہاں، جب تم وضو کرلو تو سو سکتے ہو۔[2]" جنبی کے لئے مستحب ہے کہ وہ وطی کرنے سے پہلے یا کھانے یا پینے سے پہلے بھی وضو کرے نیز اس کے لئے اپنی شرمگاہ کو دھونا بھی مستحب ہے۔

            اور جنبی کے لئے تسبیح ، تہلیل،تکبیر ،تمحید اور رسول اللہ ﷺ پر درود و سلام بھیجنا اور اسی طرح دیگر اذکار بھی جائز ہے ۔ اس تاکید کے ساتھ کہ قرآن کی تلاوت تسبیح،تہلیل اور تمام اذکار سے افضل ہے سوائے ان جگہوں کہ جن میں شرعیت میں ذکر کرنا وارد ہوا ہے۔[3]

---

[1]  ترمذی: 1/408، ابن ماجہ: 1/195

[2]  یہ حدیث صحیح ہے ، بخاری: 1/110 حدیث نمبر 283؛ مسلم 3/216 حدیث نمبر 306

[3] المنھاج ومغنی المحتاج: 1/71؛ المھذب: 1/120؛ المجموع : 2/176 ومابعدھا؛ الانوار: 1/51۔ بحوالہ المعتمد فی الفقہ الشافعی 133-135.

جنبی و محدث پر کیا حرام ہے(متن ابی شجاع)

جنبی شخص پر پانچ چیزیں حرام ہیں:

۱۔نماز،

۲۔قرآن کی تلاوت کرنا ،

۳۔اس کو چھونا اور اس کو اٹھانا،

۴۔طواف کرنا اور

۵۔مسجد میں ٹھرنا

محدث (بے وضو) پر تین چیزیں حرام ہیں:

۱۔ نماز ،

۲۔ طواف اور

۳۔قرآن کو چھونا اور اٹھا لیجانا